لابتوب جديد + أفكار عشوائية

وهوو قولوا مبرووك,, اخيرًا خذيت لابتوبي الخاص واهاهاها واااايد مستانسة بعد المشاكل الي كانت تصير ف الكمبيوتر الغبي القديم المشترك, الكل كان يستخدمه ويحط خرابيطه ويحذف اشياء الغير و ينشر فايروسات ووو…الخ. بس الآن وداااااااعاً لهالمشاكل خاصة الضرابة على من يقعد ع الكمبيوتر أول. بخبركم أكثر عن لابتوبي الصوغنن يوم أصوره لاحقًا.

وااااه اشتقت للكتابة و التصوير, ابا الحين اكتب اشياءاااات ف خاطري بس ماقدر اكتبها دفعة وحدة اليوم, لازم اخلص شغلات الجامعة الي ماتخلص, اه نفسي يمر يوم من دون واجبات و هم.

………..

صباح الخير جميعًا ^^

كيف الحال؟ طيبين؟

هذي هي الأيام مرت بسرعة,, الاجازة الربيعية خلصت وبدت الجامعات والمدارس

بالنسبة للجامعة فهذا هو اسبوعنا الثالث, والشغل ماشاء الله هيهيهي واصل حده عندي,, كل أستاذ/أستاذة مساق معطينا لستة بالي يبونه ع قولتهم الي اسمهـ Syllabus, المهم بقولكم وانا كلي أسف انه مشروع 30 رسمة ف 30 يوم فشل !!!

ما أحب أعترف بهالشي لكن لازم أقوله, أسبابي هو الجدول الطويل لهالكورس يعني أداوم من الصبح الساعة 8 الين 3 وربع أحد وثلاثاء بس الأربعاء والاثنين والخميس ابدء نفس الوقت لكن أخلص الساعة 11 و الحمدلله

أرد تعبانه و أرقد الين الساعه 4 ونص يله بعد الصلاة ابدء الدراسة و حل الواجبات والتحضير,, العشاء اتسبح و هوووب احط راسي و خخخخخخخخخ,, اللهم الويكند القى وقت ارسم فيه بس =__=”

ف خلاص أنا قلت خليني أاجل المشروع لأجل غير مسمى,, يمكن العطلة الصيفية وبكمل عليه ^^”

وداعًا بوتشي

يوم الخميس 11/2 الساعة .. ما أتذكر خخ المهم بعد صلاة المغرب اتصلت على محل الكناري للحيوانات في العين المول, سألته اذا يبا يشتري قطاو, رد علي بالموافقه, فحبيت استفسر اكثر,

تفاحة: انزيين,, اممم تباني اييبلك صور عشان تشوفهن.

راعي المحل: لالا انتي جيب كله قطوة وانا يشوف.

تفاحة: لالا محمد تعب كيف انا يجيب كل القطاو مرة وحدة للعين مول ؟؟ ما أقدر.

راعي المحل: هدا لازم انا يشوف قطوة كيف, هو زين ولا موزين حلو ولا ما حلو عشان يشتري.

تفاحة: انزين ينفع واحد ولا اثنين؟.

راعي المحل: أهسن كله يجيب عشان أنا يشتري مرة وهدة.

تفاحة: زين أوكي يلا مع السلامة.

خخخ رحت أجمعهن الشريرات السود كانن نايمات عند الثلاجة ف المطبخ و الثنتين الباقيات عند امهن متسدحات

يبت السلة وحطيتهن كلهن خخخ حليلهن ماسدتهن السلة, كانن فوق بعض و امهن ماملاقيه مكان تقعد, قلت برايهن يتحملن

وصلت المول وطلعت بسرعه فوق الا والمحل مزحوم !! هااااااه هذا وقتكم الحين !! تميت واقفه عند الباب احاول ادخل

=__=” !!!

السلام عليكم ورحمة الله وبركاته

آآآخ آآآسفه للجميع,, أحس اني ما بلتزم بـ (مشروع 30 رسمة فـ 30 يوم) وقت أريد أرسم شي ما يكون لي نفس وقابلية للرسم,, واذا رسمت اكون رسمت شي بالغصب, ما أدري ليش ؟!!

للحين رسمت 6 رسمات الخامسة والسادسة جاري رفعهم,, واليوم السابع وقفت خلاص طفرااانه ><” ما أقدر أرسم اهىء. في شخص شرير فـ راسي يقولي وقفي المشروع و أنا أقول لا كمليه ولا تكونين منهزمة و راسي بينقع !!!! اليوم حتى متضايقة ما داومت أول يوم دوام فـ الجامعة !! مع اني كنت مستعدة, الشنطة, الملابس, الجدول حتى النفسية كانت تووب و حطيت المنبه لكنه ما رن !!! لييش ما اعرف !! يستهبل يمكن ؟؟!

خخخ أمس كنت سهرانه ع فيلم The Blind Side أون ماي PSP تحت البطانية هيهيهي مسويه سينما صغيره هناك ^^ يالله كان عجيب الفلم حقًا حقًا تأثرت وتمييت اصيح ع النهاية السعيدة لـ مايك الضخم آآآ أقصد مايكل و أعتبر هالفلم من أفضل ما تابعته !! << أهااا صبر صبر يمكن عشان جيه ما شبعت رقاد بعد الصلاة ورحت فـ سابع نومة !!! صحيييييح هذا هو السبب =__=!

مشروع 30 رسمة في 30 يوم

السلام عليكم ورحمة الله وبركاته

قررت أسوي تحدي لنفسي هو اني من بداية شهر فبراير لين نهايته ببدأ أرسم كل يوم موضوع جديد عشان أتطور و أنمي هالموهبة,, هذي الفكرة مستوحاة من فيلم Julie & Julia الي ألهم الكثيرين من كل أنحاء العالم, بس أصلًا الفكرة مو شي جديد يعني ياما ناس ألزموا نفسهم و مارسوا الشي الي يبون يتقنونه ونجحوا قبل لا ينتج هذا الفيلم.

المهم, مثل ما قال الأخ مكتوم في مدونته ” لا شيء يمكن أن ينمي موهبتك أكثر من الالتزام بممارستها يومياً، سواء كنت في مزاج يسمح لك أم لا، سواء كنت متفرغاً أم مشغولاً، أو حتى لو أصبت بالملل والسأم في مرحلة من مراحل مشوارك، فإنك تواصل المضي فيما قررت فعله، كل يوم، دون أن تعطي أدنى فرصة لرغبات الخذلان والتوقف” أكمل قراءة الموضوع من مدونته هنا

ان شاء الله بعرض رسماتي هنا يوميًا اذا سمح لي الوقت,, لكن أوعد نفسي كل يوم برسم رسمه حتى لو ما كملتها, وما بنسى اني أحط التاريخ والوقت الي تم رسم الرسمه فيه عشان ما أنسى في حالة ما كنت فاضيه أرفع الرسمات ع المدونة ^^”